MAIMIZIAL Review

 Ka tukverh aṭang chuan min rawn thlir reng a; a mitmeng a fiah bawk sia, min melh kur bawk si. A awm lo anga awm tum lui hram hram mah ila, a thlá chu a dum khup mai a; a rimchhe em em lehnghal a, a hai der theih thlawt lo! 

Ka hmul thi a tiding sung sung a, ka tiril a khur der der a. “A tâwp nan chauh,” tiin fiah tuma ka va melh leh chiah chu muangchang hian a rawn seih a, a rawn lian ta tual tual a. Au chhuah tumin ṭang viau mah ila ka ká a hup tlat a, ka chêt theih chhun ka kezungpui ka tiche lui ve ngat chu ka thaw hawk a. Zanin ka haw lam, kawngsira zu rui ka melh pa hmang khan maimizialin ka lo awm lek chu niin! 

Nitin kan thil hmuh, hriat leh tawnte hian engtiang chiahin nge min nghawng le? Mumang hi thil ropui tak a ni a, khawvel pawhin a buaipui êm avangin zirna sâng zawk hmanga thiamna sâng tak neih nan te, hnam nunphung (culture) thlir lêt nan te leh kan thinlungin a pai ruk rauh rauh min sawi chhuah sak nan kan hmang ṭhin. Mumang hlut bîkna em em chu keimahni ṭheuh chauhvin kan chang a, khawvela kan pual bîk liau liau va kan thil neih awm chhun tlêmte zinga mi a nih avangin a hlu hle. A hlutna tak hian kan hmelma lian berah a siam thei bawk. 

Raymond Colney short film siam tho ‘Eleison: Zahngai Rawh’-ah khan thaw thei mang lovin, mawngîp chawih chawihin ka awm tluan zak a. Short Flim-a a rawn lêt lehna ‘Maimizial’-ah pawh exposition aṭangin ka hah nghal ngawih ngawih. Chu tak chu art thiltihtheihna ropui zia puan chhuah nan an ṭha hle thung si…

A film scoring mawlh hi no-mawi chawipui lo thei lova siamtu a nih ka ring. Mizo film industry kan hnufual fona chhan pakhat kha chu- hlauhawm a lo thlena kan phâwklêk ta chiam ta ṭhin kha a ni. Tun ami erawh a reh ri a ring tak zet! Nupa inkâra khi awm te, an rilru natna te, anmahni ṭheuha an nun ruah zia lanna te chu ‘reh ri’ kha a ni. Nu berin thawm dim taka tlânchhuahna kawng a dap ri chu a bengchheng a, pa ber tawrhna nasa tak insum ri kha ngaihthlak a hrehawm tak zet. 

Greek Myth-ah Nine Muses kan hria, anni chuan he khawvela thiam thil leh mawina te hi mihring hnena rawn thlentu-ah an ngai ṭhin. Thu leh hla inveivir zelin chu thil chu her puiin; Yeats tan Maude Gonne chu a ‘muse’ a rawn ni a, JF Dailova tan Zari. Chutiang bawkin Raymond-a chu a vannei leh zual; a kawppui Zoparmawiii leh ṭhian ṭha tak Maruata Rawite a nei. A end credits en hian tute band emaw indaih lo lutuk in, “Drums : Vunga, Bass : Vunga,” an tih ang kha an ni hauh si lo. Sawi leh sawi hnu, art mawina pholang thei tur hian mi tam tak kan mamawh lo. “Taxi trip khat a tâwk,” an lo tih fo kha huata lâk chi a ni lo; tuina inang, inzawmna thûk tak nei an nih phawt chuan thil chhenfâkawm tak an chhuah thei tlat! 

Hei aia sawifiah thiam tur hian maimizialin awm ila ka ti ngawt mai. Ka thiamna leh ka hmuh zawng zawng ngaihnawm taka sawifiah thei tur hian ka tlin lo mai zawk a ni.   En a, en nawn fo tur thil hlu a ni a. Ngaihtuah chian poh leh mihring nun darthlalangah kan mitmen a fiah tulh tulh dâwn chauh zawk niin a lang. 

Ka polaroid frame pêk paw’n set lailum a luah tih ka hmu a, ka ngaihlu tak zet!😅 Zoram fa chuam, ri hluai lo mah ula in reh ri a ring ṭhin khawp mai. Tawp san suh u, ngawi renga ngaihlutu che u kan tam a nia. 🫡