INSTANT RAMEN

 

  September 27,1940 a lo her chhuah chuan Japan in World War II an zawm ve tur thu puang in, 'Tripartite Pact' kan tih mai, Germany leh Italy nena an inzawmna thuthlung chu an nemnghet a. An theihtawp in do lêt mah se, kum 1945-ah chuan an tlâwm thu an puang ta a nih kha.

  Nau pawm hovin an lo sawi fo, "Nikhat hi a rei a, kum erawh a vei vat thung." an lo tih ang maiin, kum nga chhung lek khan an ram mipuite khan hrehawm nasa tak an tuar a. Nunna chauh chân lovin thlamuanna an hloh tel a. Indo avang a nunna chân chu thuhran, ṭâm an tâwk zui a. Nitin mai chuan dam khawchhuah tumin theihtawpa ṭan a ngai a, ṭawng hran hmang miah lo inkarah pawh khan intihbuaina tam tak a lo chhuah phah ṭhin a ni.

"Nangmah in siam chawp mai rawh." :

  Indo chu reh tawh mah se, ṭâm erawh a reh thei tak tak lo va. Ministry of Health lam chuan US-in a sem wheat flour aṭanga siam chhangthawp chu Japan hnenah chuan an sem ṭhin a. Momofuku Ando, Japanese sumdawng pakhat ve mai chuan an hnamin a ken tel tlat noodle sem lova chhangthawp zawk an sem tlat chu a hrethiam thei lo. A ngaihdan a sawi chuan, "Nangmahin siam chawp mai rawh." tih thu a chhan let a ni.

  Wheat flour hmanga siam theih noodle, awlsam taka ei mai theih, tui tho si chu siam chhuah tumin kum tam tak chu a rilru a seng a. August 25, 1958-ah chuan kum 48 mi niin tun hnua kan ei tak fo, 'Instant ramen' hi a lo hralh chhuak ta a ni. An ram retheihna ata din chhuah tum tlat mipuite tan chuan, minute hnih leka lo hmin mai thei chaw chu thil ṭangkai tak a lo ni ta!

  Kum 1971-a 'cup noodle' an siam hnuah phei kha chuan Asia khawmual mai pawh ni lo, an do ṭhin US ngei pawh chuan an lo hmelhriat phah zel a. Kan ram ngeiah pawh a ṭangkaizia leh a tuizia chu sawi ngai lovin a chiang a ni.

A la tlai lo:

  Kum 95 a nihin Momofuku Ando chuan a hna a chawlhsan ve ta. Thil thar hmuchhuak tur leh bul ṭan tur hian naktuk kan nei tih hrechiang em em tute zing a mi a ni a, "Kum 40 i ni emaw, kum 50 i ni emaw, khawvel hian bul ṭan a la phalsak che." a ti a ni.

Hri avangin khawvel a buai a, reh dup si hian chhungril ah kan thla a phang vek a. Kum 1592, London-ah hri lo darh leh avangin mipui chu tuna kan ṭawngkam lar tak 'Lock-down' in an awm a. William Shakespeare, kha tih hun laia tlangval naupang tak khan Venus and Adonis leh The Rape of Lucrece chu thla ruk chhunga an tawmim lai khan a lo phuah a. 

  Tin, kum 1665-ah chuan hrileng avang thovin Isaac Newton chuan a zirlai zir chhunzawm thei lovin an khaw lamah a haw a. A tawi zawngin, tun hnua hrethiam fumfe lo pawha kan lo sawi rual dual dual ṭhin 'Theory of Gravity' bul lo ṭanna chu a in 'Quarantine' laia an kawt kaia apple kung pakhat vang a ni.

  Ṭha a awm a, sual a awm. Thil ṭha lo pawh a thleng fova, chetsual pawh thil theih a ni. Chinese chuan hre chiangin Yin and Yang an lo nei a, hun khirh tak nia kan lo hriat pawh hi hun duhawm a ni thei tih hi min hriat nawn tirtu lo ni se. Pathianin ngaihtuahna leh taksa min pe a, duhthlanna leh remhriatna nei lo mihring kan awm lo. Noodle pack khat, thuziak pakhat leh apple tla mai mai avang hian khawvel hi a danglam thei tih hre rengin, he kan hun tawn mekah hian keimahni zâwn ṭheuhah hlâwkna chhar tum ila, bul ṭan tur hian kan tlai lo tih hi inhrilh nawn fo ang u. 

(Thursday, ‎January ‎14, ‎2021, ‏‎4:50:13 PM)