-Lehkhapuan-

 Lo lêng rawh.

Flat Earth Theory hi hre lo kan awm lovang. Ka rin zâwng ni chiah lo mah se hetiang deuh chiah hian ka ngaihtuahna hi a awm niin ka hre ṭhin. A phêk a, a pan thlerh a, a zâwl duai bawk a, a ruak huai mai a ni. Pawl 10 kan nih laia thluak lem kan ziah ṭhin nen kha chuan an inang lo lutuk ringawt! 

Ka ngaihtuahna chu ka thluaka eng khawl emaw ber chuan hmun âwl laiah chuan a lo ziak thla zel a, a len loh tâwpah phêk thar keu lehin a hna a thawk leh ṭhin ni ber hian ka hre ta. 

Chu lehkhapuan chuan tâwp chin a nei lova, ka ngaihtuah peih chhung chuan a ziaktu pawh chuan chawlh a la ve ngai lo, a post-ah chuan a lungawi lutuk. [ Sawi chhan nei lo (^_-) ] 

Ka lehkhapuan chu ka kutah a innghat ringawt lo va, ka vêla thil awm te, ri te leh rim te chen chuan pawimawhna an nei vek a. Ka ngaihtuah hram hram a, ka inhawn phawt chuan lehkhapuanah chuan engkim a leng a ni.

Fiamthu thiam deuh pakhat hian kan veng rawlthar a zilhna a, "Hmingthup, football hi chu bansan chuang lo la. Mahse, tui lutuk duh suh." a tih nen khan ka inkhaikhin a, kan inbûk tawk chiahin ka hria. Ziakmi ka ni lêm lova, ka hrat ve hrim hrim a. A bo tâwk chiahin ka hria a, ka kut a hlei ve satliah a ni. Mahse, thingpui ka lum tui thei lutuk! (hei pawh hi ka inhmuhdan tho.)

Lo lêng la,

Min zirtir tur te, min zilh tur te leh duhsak taka min hau bawrh bawrh tur te in ka sawm che a. Tin, he lehkhapuan ah hian i lo ngaihtuah tawh ang chiah chiah te pawh ka lo ngaihtuah ve anih pawhin, min râwn hmasa lo chuan ka thuziak hi lo tidarh lo hram rawh aw. "A va hmelṭha vawng vawng ve... " tih veng veng tur chu ka ni lo na a, ṭha taka min dil phawt chuan ka thilphal ve riau a nia. (IG: @thlengthlengi.ezs)

He lehkhapuan a ka ziahrân fahrah tê tê te hi chhuantlâk ni lo mah se, mi pakhat talin a lo ngaihtuahzui vawng vawng anih chuan mi vannei berah ka inchhal e. 

A ti alawm Pu Kaphleia pawh khan, "Kan damrei leh reiloh hi kum te, thla te hian a hril lo ve, kan nun dan leh thiltih in a hril ber zawk a ni." 

I nunah chuan engtin emaw, engtik ah emaw, eng emaw taka thu ka lo sawi ve anih chuan ka lungawi e. 

- Thlengthlengi.ezs

14.09.2021

12:50 AM