CHHÂNNA

Hre ber emaw ka inti fo a, ka hriat lohzia lah ka hrechhuak zing tawh. 

Hriatna leh hriatpawlhna bial chhungah chuan ka vir tawn muai muai a, chawlh ka lâk apiang chuan zawhna thar ka inzawt zel bawk a.

Chhânna hmuh beiseiin zawh tur ber hre lo chuan ka kual ka kual a, rin tur ber hre lovin ngaihṭha miah si lo chuan ka teirawlai mai mai a ni ber.

Hriat belh châkna in ka khat a, mah se ka zawhna hmasa te chu chhân an la nih miau loh avangin zawhna zêm chu a khatliam takngial dâwn a ni! 

Zawh belh chi a ni tawh lo. 

Eng thlipui emaw takin min nuai lova, he zan hian danglam bîkna riau a nei hek lo.

Thla bial nan zan hnihin a dang a ni mai a. 

A sâwl bûi chung chuan chhûm, van zau taka tui hleuhte chuan an hliah tawn zak zak reng tho a. 

Mahse, keimah chuan keima bul vêkah chuan "Heti hian ngaihtuah chhin ang." a ti thut a, hetia ka awm lai tak hian alawm heti taka chhânna ṭha hi ka hmuhchhuah tâk chu! 

Ka zawhna zawng zawng chu ka inzawt fo a, a chhânna chu keimahah ka lo zawng ṭhin a lo ni a. 

Ka tlin lohzia leh ka hriat tlêmzia chu ka chanchin hre ber ber tute thusawi ai chuan keimah hian ka hrechiang zawk reng si a,

Mah se chhânna chu keimah ah ka lo zawng ṭhin tho nia! 

Chhânna ka hmuhna tur tak bula ka zawhna ka thlen meuh chuan, ka chhânna dawn chu mak ti viau mah ila pên khatin finna ke ka pên belh a, ka pên lah chu a hlawk êm êm mai lehnghal! 

"Chhânna a awm lo." tiin min chhâng a. 

17th Oct, 2021(Sunday) 

10:43 PM