Coat of Many Colors

 Zing dar thum a pêl tawh a, ka mut erawh a la chhuak lo nasa a ni! Ka mutchhuak lo lutuk chuan youtube thlenchhuah tum ni âwm fahranin a hmuhnawm a ka rin apiang ka hmet kual a. 2006, Kennedy Center Honors-a Shania Twain-in Dolly Parton's Coat of Many Colors a sak chu ka en fuh hlawl a, zanin a ka video enchhuah awmchhun a ni.

 Ka naupanlaia ka kîr leh lai kha ka hre lo rêng rêng. Kum 5 mi lek ka ni a, kan inchhung, bang hring dal deuh phât, TV hnung pâwng, kan choka nena indai danna chokût leh inchhung luh chiah ding lama kan chhuar uk lianpui mai chu an lo la ngai reng a. Choka thutthlengah ka Pi-in zozial a lo ṭawn a, ka Pu chu ngawi rengin a bulah a lo ṭhu a. Ka Ni chu KṬP thilah chhuak turin a insiam mawlh mawlh a, ka Nu leh Pa leh unau te nen thlang lamah chuan kan ṭhu dal a.

 Lehkhabu kâwm tuamna zo tawh lam, sei rît rêt chu khuang vuak fung lem atan U Mama nen kan inchuh that that a, kan bulah ka Pa chuan ṭingṭang a pawm a. Ka laizawnnu te chuan songbook an keng a, ka Nu in a keypad phone. 

 Sunday school-a kan sak ṭhin hla chi hrang hrang kan sa kual a, second 15 chauh lâk theih mah ni se ka Nu chuan kan zai lai chu a lo la zêl a. Kan hla thûl khung, 'Coat of many colors' chu kan sak chhunzawm ta ral ral a.

 Nun kha a nuam ṭhin maw le. Tuna ka dinhmunah hian lungawi lohna leh duhkhawp loh pakhat mah ka nei lo. Amaherawhchu, kum nga mi keimah khan, tuna ka dinhmun hi kha a rilru puthmang tho khan chang ta zawk se, a hlim dân chu a bûk a rit zâwk daih ang tih ka chiang. 

 Thil hi ka hre vek lo, ka hre hnem tawh mah mah thung. Khatih hunlai khan zing dar 3 thleng thlengin engmah ka ngaihtuah ngai lova. Ka thiamdân dân khan hlimna ka chhar chawp ṭhin.

 Ka Pi chuan tarmit tel lovin Bible a la chhiar thei a, ka Pu pawh a duhna hmun hmunah a kal ṭhin. Ka Nu a la hrisel a, ka Pa kha khawvêlah a chak ber a. Ka laizawnnu te thil tih rêng rêng kha a ropui a, a mawi bîk riau a. Ka nuṭapa nen chuan kan awmdun na apiangah kan inkhawih ṭe ngei ngei zêl.

 Keimah ai mah chuan ka chhungte kha ka lo ngai a nih dâwn hi.

 Dolly nu-in a fanu tana puanthem tin a ṭhuibeh kha hmangaihna nena chilh an ni a, kan chhungkua pawh chutiang bawk chuan. Rawng chi hrang hrang, a lian leh a tê, a lâr leh a thim. Ka ṭhiante chuan chu kawrmawi ka hâk hunah chuan min nuihzat mah se hmangaihna in a thil khâwm chu ka mitah a mawi ber a. Hei tluka kawr mawi hi ka la nei ngai lova, ka neih vawikhatna a ni.

 Chu kawr an siam lai chuan a ṭhuidân chauh ni lo, nunpui dân tur min zirtir a. Mite angin ṭha ber, mawi ber leh thianghlim ber ni lo mah se ka tan chuan a hlu fe zawk a, an neih ka awt bîk lo.

 Chu kawr chu kum hei leh chen hi ka lo ha ve ta. A châng chuan ka nei ani tih pawh hriat loh châng ka nei a, min ṭhuisaktu ka theihnghilh châng lah a tam. A chhiat mai hlauhawm khawpin ka ha rim a, a lazai tina thu inthup chhiar thiam loh châng ka ngah mai. Mahse, ka tan khawvêl hi a lo hrehawm a, hma lam pan tuma ka beih ṭauh ṭauhna kawngah ka tha a lo ṭhum a, ka khup a zâwi chang chuan min thlamuan a, thuin sawi lo mah se a uapna hnuaiah chuan chakna ka hmu ṭhin.

 Zing a lo ni leh ang a, ka tho thei lo leh ngei ang a. Ka Nu in rawng alo bâwl ang a, ka Pa in min kai tho ang a. Ka u te an buai buaiin an buai leh ang a, ka Pi pawh vengthlanga lên thlâk mawlh a engto leh ang. Tin, ka Pu pawh a zâlna rûn tharah chuan a thlamuan ngei ka beisei a. Rawng mawi tak ka kawra a bel hi, a ṭhian a ngaih ṭhin êm êm te hnenah khan inchhirna tel hauh lovin sawi châm chî se, kan inhmuh leh hma zawng a titi pui ber ni se ka ti khawp mai.

-23rd Feb, 2022

3:26 AM - 3:54 AM