VIENNA

 

Kum 15 dâwn a liam tawh, a pa a hmuh lohna chin chu. Pa pakhat, Hitler-a vang ngeiin a pa chuan an chênna Germany chu a chhuahsan a nih kha. Tunah chuan Vienna, Austria khawpui mawi takah a chêng a, mah se Billy chuan mak a ti tlat. Hitler vanga pem ni si, Hitler-a vanglaia a tualchaina hmunah kher a lo pêm chu a mak a ti riau a ni. Amaherawhchu, Cold War laia ram pahnih inlehthal tum rêng rênga an awm lai pawha thlamuang taka an inbiak theihna khawpui kha a ni miau a. Vienna khawpuiah chuan engkim a inchawih mawi chawp vek a ni ber! Zû in tûr zawng pawh ni la, Vienna beer ṭha mi leh Armenia zu ṭha mi chu i hmu kawp tho ang. Chuti ang khawp chuan ram leh ram, hnam leh hnam leh rinna tinreng chu chu khawpuiah chuan a leng a ni.

 A pa chu zawngchhuak in, Vienna khawtual chu an fang dun ta a. Nu pakhat, kum 90 dâwn tawh chuan tual a lo phiat a. Billy chuan a pa bulah chuan eng vanga chu pitar chuan hna la thawk reng nge a ni tih a zawh chuan awlsawm têin, "Thil ṭha ti niin a inhria a. Thil ṭha a ti a, a theih tâwk hi nuam ti takin a thawk alawm. A hnathawh avanga kawngpui a lo fai ta hi a hlimpui a ni." a ti mai a. Billy chuan an thil thlirdân chu ṭha a ti ngang mai!

 Billy te ramah chuan kum upa zawkte chu hnawk an ti thuai a. An chhungkaw khai dingtu chu in dangah, amah ang thova hmangaihtu nei tawh lo te nen chuan an dah khâwm rûih zêl mai a. Vienna mipuite ngaihdân chu mi tupawh in nei ve ngat se chuan, upat chu a huphurh lo tawp mai! A tar kun khûp bih hnuah pawh ṭangkaina a la nei reng dâwn a, chu chuan ngaihdân thar a neihtir a. Nitin chuan hmanhmawh miah lova ṭangkai taka rei tak nun theih chu a thlahlel a ni. 

 'Kan vanglai' kan tih fo hi, kan vanglai chendân tur dikin kan chên lova. Rualpâwl loh hlauvin kan hmanhlel a, rualkhûm loh hlauvin kan hmanhmawh êm êm a. Kan hlimna aiin midang hlimna kan dah pawimawh fo va, midang lungngaihna vang mai chuan kan hlimna hian kawng a bo fo. Rual awhna chuan min hual vêl a, ngawi reng chuan chhungril aṭangin min hîp reng a. Kan duhna a zual zêl a, a tawpah chuan kan pumin, kan inrin loh lai tak chuan min dawlh ta ṭhin a ni. Vienna khawpui chuan min nghâk tih kan theihnghilh phah a. Chu kan tânna lung in chahbi chu kan awrh reng a, rit ti êm êm chung si leh, chhuah theih tih hre reng si chuan kan awrh lui tlat a. Chu kawngkhar hawn nachang hria apiang chu Vienna khawpuiah an lêng a. Thlamuang takin, zawimuangin, hlim takin an tum ram an thleng ṭhin. 

 Vienna a ni emaw, kan tânna lung in a ni emaw, engtikah emaw chuan kan la boral dâwn. Chu chu kan pian tirh ata tawh kan hmaa thil awmsa awmchhun a ni. Misual nih leh mifel nih inkar hi a hla lo, tân in a tâng tur leh zalênna temna hmun hi pên khat leka zau a ni. Hetiang chiah hian chhungrila hahdamna leh saltânna chu an inkar a zim a, kan awm duhna hmun erawh thim leh var tluk hial khawpa inang lo an ni. 

 Kan dam chhung chuan Vienna chuan min nghâk reng a. Kan duh phawt chuan chu khawpuiah chuan kan lêng vel thei a. Kan pêm duhna hmun apiangah kan pêm thei a, kan duhthlanna chauh chuan min dal a.

 Hmanhmawh suh, ila naupang ania aw! Khawvêl kum chhûtdân a kum i chhût fo chuan upa emaw i inti mai thei, kei chuan kan boral hma darkar ah bâk hian tarah ka inruat phal lo. I rilru chuan upa a intih miau chuan i tum ram i thlen hma hauhvin i tha a ṭhum thuai ang a. I vanglai nia i hriat hun chu a pêl tawh si a, i thil châk ti turin chakna i nei lo dah ang e. 

 I dinhmunah khan lawm la, lungawi mai suh. A aia ropui zawk leh tlâkna sang zawk pan zêl la, i nihna dik tak kha hloh chuang suh. Mi â chauh an vuina khawvêlah siam ila, kan suangtuahna te an thleng dik kilh kelh dâwn lo tih hi pawm ang aw? 

 Kan nung tawp thei ania. Kan nung tawp thei a, kan tar tawp thei a, kan ral tawp thei. He taksa, ral leh tur hi ka nuntir tawp dâwn lova, ka tar ringawt phal lova, ka ral tawp dâwn hek lo. Kum tharah thlasik a ral ve tial tial a, khua a rawn lum chhohdân hi ka chhût fo ang a, kumin a ruahpui vânâwn thawk hmasa ber ka thlir dauh dauh ang a, thlipui a thawh ṭumin chhiatna thlen lohnan ka dil fo ang. Kan naute kum hnih tlin ni ka nghâkhlel ang tho hian kum sawmpariat anih hunah pawh ka phûr ang a, ka bawrhsawm chânga ka chhungte min enkawlna te, tum lâwk êm êm awm lova ka zin thut te leh naktuk ni chhuak leh tûr thleng chuan min tilâwm ang. Ka thla a muang a, sana inkhâwng tin hi ka tana ruat niah ka ngai ang. Ka nung tawp dâwn lova, ka nung reng dâwn. 

 "When will you realize... Vienna waits for you?" 

-

15.02.2022 

1:22 PM - 2:24 PM

Vienna - Billy Joel

https://open.spotify.com/track/4U45aEWtQhrm8A5mxPaFZ7?si=saxe5yMfRhaIt5G9qzcttw&utm_source=copy-link