NILAINI

 "Lalhmangaih, Lalhmangaih" min ti mawlh mawlh mai a, a châng hi chuan ka nuih a za ru ve ṭhin. A tunu hming, ama sak ngei pawh a fanu tlum ber hming nen a hriatpawlh ve ta. Ka naupan lai chuan min paw kual reng a; tu emaw tih dan ang deuh in, 'Dâr ding lam a kham chuan vei lamah' alo ti ve lauh lauh ṭhin. Pa ṭawng tam lo tih takah ngawi rengin ka bulah a ṭhu a, ka duh duh danin ka tâl a, chhel kha min lo va zirtir nasa ṭhin tak! 

 Sikul ka kal peih loh avanga ka nawrh ni kha ka la hre reng. Ka *nilai* pheikhawk chu ka Nu in min buntir a tum pawhin ka tâlchhuak zêl a, ka Pu mal chungah ka ṭhu a, ka Pu chuan a thiam ang tâwk chuan min lo chhan ve a, sikul pawh ka kal loh phah nghe nghe kha! 

 *Nilaini* dang leh pawh sikul banah min hruaitu tur ka la hmuh ve loh avangin classroom lamah ka chho leh a, a hnu deuha ka zuk bih dêk dêk chuan ka Pu chuan min lo nuih sâng mai a, khami ni khan kamis uk dal lam a ha a, smart pants leh pheikhawk pum a bun. Ka rin loh leh ka beisei loh lutuk in a min rawn lam ni kha ka theihnghilh leh tawh ngai lovang.

 *Nilaini* dang leh chu ka Pi, min rawn lam ṭhintu ka hmu si lova, ka Ni in nau a neih dâwn tawh avangin a vei anih ka ring a, eng emaw tak hian min mawlh a, hmanhmawh tak chuan in lam panin ka tlan haw ta a. Kan kawtah chuan taxi hi an lo bawr laih a, ka hmuh hmasak ber chu ka Ni a ni tlat. Dik lo a awm chiang mai! Ka va tlan phei that that a, ka Ni chuan min lo hmu a, a lam ka pan pah chuan, "I Pu Biak In sakna aṭangin a tla palh a, a ke ruh a tliak a, Damdawiin kalpui a ngai dâwn." a ti ta mai a, sawi tur a va vâng duh tak! Taxi chhûng lam chu ka zuk en a, a vâng zawng hian ka Pu chu a seat-ah an lo muttir a, a mitmeng kha ka theihnghilh leh tawh ngai lovang! 

 Kum sawm lai a liam ve leh ta. Vawiin pawh *Nilaini* tho a ni a(22.05.2019), kan inchung zâwl ah kan tei kual vêl a nih hi. A natna avangin a phun ka la hre lo va, a thinrim ka hmuh âwm ka la hre lo. Ring deuh hleka biak a ngai ve ṭan tawh a; mahse, kan thinlung ah hian min hmangaih a ni tih hi a ri ring zawk. Hei hi ka Pu, ka ngaihsan em em Hranghnuna anih hi! 😊❤️

24th Apr, 2022:

 Ka Pu, nilaini vawikhat dang leh chauh tal min thlenpui leh thei la ka tih vei nen, duhthu ka sâm chhungin thla 10 lai chaw kan khawrh kêp ta lo che.

 Ka theihnghilh palh ang che tih hlauvin i hahchhiau ri te, i khuh ri te, i nui hawk hawk ri te chu ka rilruah hian ka ngaithla nawn fo. Khua chhia se i chauh ka lo la hlau fo va, khua ṭha deuh se i inbual ni emaw ka lo ti leh tlat ṭhin. 

 Vui thei kan ni lo va, lâwm zêl zawk tûr kan ni te hi runthlak tih lek lek châng ka nei dâwn nia maw le. Mahse, nang ber i lâwm a ni ang chu maw, i reh rei ta êm mai. 

 Kan theihnghilh ngai lovang che.