Theihnghilh la, Hriatpawlh rawh

Sikul kan kal lai chuan test pawimawh kan hmachhawn dâwn reng reng in ṭhiante nen khan, "Theihnghilh la, hriatpawlh rawh." tih kha kan infiamna lar zual a nia. Sawi nawn fo chuan kan thiamsa ai mah khan a hriat zâwk ve theih tak takin ka hria.

Zanin chu ka U nen dar 2 dâwn thleng kan titi a, hringnun hrim hrim hi kan chinglet a, kan chhoh en hê hû a, a chang leh kan kuai thlu tawp a, a tâwpah chuan Pathian ah bawk kan tâwp leh nge nge zel.

Mu tura ka lut chu ka rilru ah, "Theihnghilh la, hriatpawlh rawh." tih ringawt chu a rawn ri leh ta tlut tlut a. Mitthla ah sikul kal lai a rawn lang zut zut a, sande sikul phur taka ka kai ṭhin lai te, naupanlai leh nun awmzia ka hriatthiam ṭan lai te chu a rawn inlar ta tliar tliar a. Chhungkua ah, ṭhiante zingah, Kohhran ah leh khawtlang a ka lo lungawi tawh loh ve ṭhinna te kha chiang fek fawk a sawi tur mang ka hre tawh hauh lo nia! A hunlai khan ka lungawi lo ve hle sia...

Midang chênpui ṭhin mihring, rual pawl ṭhin mihring kan ni miau a, hei aia nasa zâwk a lungawi loh hun ka la ngah dâwn chauh tih chu - ruah sur ruala a hân leh dâwn ani tih kan hriat tluk hian keimah ah chuan chhimbal chu a zam ta a. Tah chuan, "Theihnghilh la, hriatpawlh rawh." tih thu pawimawhna hi ka man pha ve ta niin ka inhria.

Ka lawm lohna chungah khan vawi tam tak lawmthu sawi sen lohna tur ka lo tawng tawh a, ka harsatna tawh te avanga vawiin lo thleng a, ka theihnghilh a, ka hriatpawlh tâk avanga nunhlui sawi châng a nui bâwk bâwk thei ka nih avang hian eng pawh hi han lung nih loh chiamna chhan tur ṭha tak a lo awmin ka hre ta lo.

Thinrimna te, vuina te leh lungawi lohna te hi mihring dân ve rêng a ni a, chuti ang bawkin ngaihdamna te, zaidamna te leh hlimna te pawh. A hnu zâwk nihna nei te hi an inchhir ka la hre lo va, chuvangin eng thil pawh tâwk ila, "Theihnghilh la, hriatpawlh rawh." tih rilru dam tak pu chunga lo hmachhawn mai hi ṭha in ka hre ta a ni.

-Thlengthlengi.ezs 

22.12.2022

02:22AM