Ka Nu Kut.

Pathianni zan a ni a, ka la hre reng mai. Ka Nu bulah chuan ka ṭhu a; mutthluk loh tumin ka hawi kual a, ka che sek a. Chutia khawvel hran daiha ka chên lai chuan ka phu zawk a, ka Nu kut chu ka va vuan a. Ka Nu chuan Biak In chhunga ṭawng hi a phal ngai lo, mah se kha mi zan kha chuan ka insum hman thlawt lo va, "Nu, i kut a van zûr tawh." ka ti ru sap a, a kiai sak a. A seih chuan eng nge a entir chu ka hrethiam lo, ka mak tihna avang a nui nge ni ang a, a damchhunga a thawh rah zawng zawng a sengna kut ka hmu thiam ve ta chu a lâwm ni ang? 

Kha mi zan aṭang khan ka Nu chu ka rual hian a lo upa ve telh telh a ni tih ka hrethiam ve ta a. A naupanlai chanchin min hrilh te chuan ka nuih a za ṭhin, "Ka Nu, ka piantirh a ta 'Ka Nu' hi kei ang tho hian hmeichhe naupang, tleirawl, nula a lo ni ve tawh ṭhin ang a maw?" tiin. A chhan chu ka Nu a ni miau a, chatuan in ka Nu a nih dâwn miau avang chuan ka thlir thiam tlat ṭhin lo, a chhan chu ka Nu kha a ni tlat si a lawm! 

Ka Nu chuan thiltih theihna mak deuh mai hi a nei a, a kut ah chuan langsar tak si, hmuh theih miah loh hian a pai roh a. Chu a kut chuan kan na lai a khawih a, Pathian hnena min ṭawngṭai sak apiang hian damna a lo thlen fo tawh a. Chu kut chuan eng bungrua pawh a awmna lai a dap fuh chat chat thei bawk a. Chu kut thiltithei bawk chu a pangpar te pawn an hre hrang a ni chêk ang chu, a awm loh hlek chhung pawhin an duhna lam lam hawiin an lo indawm kun ngal tawh ṭhin nia! 

Chu kut chuan theihna tam tak nei mah se a taksa peng dangte chu der dep tak, na hma êm êm hi an ni thung si a. Mah se, ka Nu chu ka Nu a ni miau a, theih loh pawh a nei hian ka hre ṭhin lo. Kan upa berin, "Ka Nu." tia a koh ni aṭang khan a laiah hming chu a thlauh thla a, kumkhua a kan tan a Nu ni tawh turin a rawn piang nawn leh ta. Pathian khian mal a sawm a, vawiin ni thleng hian "Nu, Khawnge? Eng nge? Tu nge?" kan la ti cham chi chu a nih hi. 

Piancham chibai le, ka Nu. ❤️