Kan Zinkawng

  59th KṬP General Conference, Kolasib Diakkawn field-ah May ni 5-8, 2022 chhunga kan neih tâk kha ka hriatchhuah chang hian, "Kha Conference kha chu aw!" ka ti leh vawng vawng ṭhin. 

  Kha Inkhawmpui kha thil mak a ni hranpa ve hrim hrim a; Mizo mipui te hriat ngai loh, khawih theih si loh natna ṭihbaiawm tak laka min chhanchhuak tu pakhat a ni in ka hria. "Sava bawma piang sava chuan zalênna hi sual emaw a ti," an lo ti ang deuh hian kha chen kan lo inkhung tawh avangin chhuah hrim hrim pawh kha sual ah kan ngai a, kha ti zat ṭhalai rual thawk chhuak tur pawh kha rem ti lo an tam khawp mai. Mahse, kha ti zat pungkhawm ta na na na chu boruak pawh kan indaih lo va, kan hmai tuamna phelh a lo ṭul a, kan insi chawt chawt a, hlim takin Pathian kan fak ho va, eng buaina mah awm lovin nun tharin kan haw ta hlawm zâwk a nih kha.

  Kei pawh he Conference hi, "KṬP hi ka ta ve tho alawm a lo nih le!" ka tih theihna chhan a ni ang tih ngaihna reng reng ka hre lo. Kan branch aṭanga kal te kha kan dangdai hlawm bawk a, kan thil tawn pawh a dangdai thei khawp mai. Ka diary ka chhiar lêt pawh hian, 

"May ni 5. 

9:15AM : thlanmual aṭangin kan chhuak. 

9:45 AM : Bawngkawn-ah pitar kan su." tih a ni a, Pathian zarah na lutuk kan awm zui lovin ka hria. 

  Kolasib kha thleng lovin kawng lakah min hawnpui leh daih pawh ni se, a kal a te hrim hrim khan nuam kan ti tlâng a. U Chhuanga hovin Conference hla bu, Kristian Hla Bu leh ruah ṭham loh hla, a tawpa "Isu" tih telh tâk avanga ngaih ṭha êm êm a kan sak te pawh a awm nawk mai, kan lung kha a awi hliah hliah. Tv. Ruatdika lung tileng ber tura ka rin chu bus bang beng meuh a bus dang kan tawh apiang a aw puam ṭalh a "Kristian te u, kal zel ang u," tia a rawn ṭhial ta ṭhin kha a nih ka ring. Kha bus chhunga chuang te kha ka ngaihtuah lêt vang vang hian kum a lo vei leh meuh chuan Pathian in min lo hruai nasa hlawm êm êm a, zau zâwk a A rawng bawl tura kal ta thlengin kan lo nei nia!

  Ruah hmi cher cher hnuaiah 'Hmangaih ber te lenna Kolasib ilo thleng ta' tih intar kan han hmu a, a khaw daiah kan in report laia Documentation Team lamin an kawm beisei êm êm in kan mipa ho an han chhuk sap sap a. An en vang vang khan an lung a awi tih an hria a ni ngei ang, an lo kâwm lêm lo a nih hmel. Tichuan tha tho takin Electric Veng lam pan chuan khawchhung kan lut ta a.

  Ka laizawnnu te pahnih nen Nu Lizzy te inah kan thleng a, kei ni tluka thleng nuamsa kha an awm âwm lo ve. Inrinni tlaiah U Tetea'n min rawn fin ve leh a, tichuan kan kawt chiah a bus lo châng in cheng 20 khan pandal kan pan dial dial ṭhin a. 

  Ka ti leh pek ṭhin ang, Conference ti ropui tu chu bus mawlh hi a lo ni! Kha bus chhungah bawk khan khaw hrang hrang a ṭhalai rual inhnawh ta ṭhin chu ṭhutna ṭha chan ṭum a lo awm lo thei lo va, kan U pakhat pawh a lo insawi officer hman ṭêp. Kha chu ka chiang, a hnungah kan ṭhu. A pawi ta ber mai chu pa zakzum tih takah phone no. mawlh kha a lo dil lo va, he Inkhawmpui a hriatchhuah châng hian Palai Lawm Inkhawm zana a ek chhuak insum lung hum reng leh Sai sa nen khan a hriatchhuah ve fo ka ring. Nula lam pawh kan Kohhran Hmeichhe Hruaitu kaltlang meuha rawn zawng zui an awm a, kan branch kha kan tla na tlâng a ni! 

  Keipawh ka nun a tel reng 'chet chhiat' pawhin Kolasib thleng min zui a. Ka u te ho kawng ka bo pui leh hram a, a tâwp zan a thil thleng phei chu a pai a pai ṭawih ral rak tur thil a ni. Mahse, kha Inkhawmpui khan ka hriat loh laiin ka nunah thu tam tak a lo sawi a. Nun hlut zia te, nung tura chak a lo ngaih zia te leh Kohhran hlut zia te thlengin min hriatchhuah tir a. Kan u te hovin min ho khawm thiam êm êm a, lam hunah an lam mai te kha kei ni ta ila ka harsat viau ka ring. 

  Zinkawng a ka ip ken kha kan haw lamah pawh pangngai reng mah se chhungril lamah thil ropui tak tak ka hawn lêt thung a. Kal lama U Gi-a hla thlan, kan la zawm hleih theih loh 'Kan Zinkawngah' tih pawh hawn kawngah chuan tui takin kan sa ho leh dal dal thei tawh a. 'A êngah' phei chu Zoram deng chhuak kawr ai pawh khan a lar zâwk ta ve ang! 

  Kum khat chu a lo vei ve leh ta reng mai. Kristian Ṭhalai Pawl chu ka nunah a hlu zual zel a; peih vanga Rawngbawl kan nih loh zia te, Pathian rin tlat a ṭul zia te, a hlawk zia te, ṭawngṭai thiltihtheihna leh zirlai tam tak chu kha Inkhawmpui ka chhim aṭang khan ka la zir chhunzawm zel a ni. Vannei ka inti a, mahni in lum kan thlen rual rual a kan sawi zin ber chu, "Conference ni leh tawh se." tih kha a ni. 

  Pathian in min veng ang a, kum 2024 a lo herchhuak leh ang a, Ngopa lamah nikum aia zinkawng ngaihnawm zâwk zawh leh ngei tumin ka in sang mar leh dêr tawh mai. Ngopa ah inhmu vek ang u aw. 😂