Perhpawng

  Mit khap kar lekah Vau thla kan lo thleng a, khua a vawt lutuk tawh lo va, college-ah pawh kawrlum ha hnuang leh thawmhnaw pan tê inbel kan inkat leh nuk tawh mai. Boruak nawm hunlai ber mah ni se nileng a ṭhut tlawk tlawk mai chuan taksa a chau a, taxi stand lam pan a ka chhohpui lah chuan exam a tihchhiat avanga a inchhir thu ngawt min hrilh bawk nen, engtin emaw tak hian ka hnual riau a.

  Theihtawp chhuah châng te, chakna rêng rêng leh châkna pakhatmah neih loh châng te a tam avangin lehkhazir hi thil awl ai a ni lo va, mahni kut zal a tla ah chuan kut hnathawh nen a hrehawm dan a danglam bîk chuang lo hian ka hre ṭhin. Chutia kan titi mawlh mawlh lai chuan pa upa tawh lam, pum raw lian lutuk lo hian, "Bazar ve dâwn em?" a rawn ti zauh a, an mi koh ṭhin dan pangngai anih avang chuan ka bu nghauh a, seat hma lamah ka chuang ve ta ran a. Tlangval pakhat leh nu, nau tlei tawh tak pawm nen chuan kan chuang chho ta a.

  Forrest Gump-a Nu khan "Mi reng reng hi an pheikhawk bun aṭangin a nun dan leh a kal tawhna a hriat theih," a tih chu hre rengin mi tam tak teh nan ka lo hmang tawh ṭhin. Driver chuan bata chapal a bun a, a ke chuan lotion a tawk ngai reng reng lo ani tih hriat tak hian êng lam a pan deuh vûk mai a. A ṭawngkam leh incheina aṭang ringawt pawhin a nun chu hrethiam in ka lo inhria a, ngaih dan tur tâwk ka thiam mai a, mak ka ti lêm lo.

  Thui pawh kan tlan hma chuan a taxi ri boh boh thei tawh chu a timuang hret a, kawngsir a chawhtawlh chhip chhuan hnenah chuan, "I la zo lo ami?" a han ti lauh mai a.

"Aw, zo lo deuh a."

"Khawnge ila kal dâwn tikhan?"

"Muangchang in Bazar lamah ka chho ang chu ka ti."

"Lo lut rawh ka phur ang che."

  A balh zia leh a sangha zawrhlai avanga a rimtui loh zia chu phat pui noh noh chung chuan a rawn lut ve ta rawk rawk a. "Ka rim a chhe si a ka va inthlahrung e aw...." a aia fiah deuh chuan a rawn ti leh a, a bula tlangval ṭhu nen chuan ho kan tih thu chuan kan chhang a. Driver chuan, "Kan nau te a ni sia, han phurh loh ngawt chu ka ti bawk sia, in lo hrethiam mai a ni ang chu. Khu ti lamah i chhuk em?" a ti zawm zat a. Vawiin a sangha zawrhna lam ho a sawi diat diat a, an titi dun nghal ta mawlh mawlh a.

  Mizo nuna mawi ka tih leh ngaihnawm ka tih tawp theih loh chu upa zâwk te titi ri hi a ni a, tunah ngei pawh rei lo te chhungin ka chuanpui te chu an titi leh bawrh bawrh tawh hi. Thu khuh tak si in an chhungkaw chanchin an sawi ho mial mial a, khawpui a awm tura taimak a ngaihzia te leh thil harsat zâwk zia mawlh chu an titi tui ber a ni. Driver chuan, "Hmanni nu pakhat ka phurh pawhin, 'Mihring hi chu perhpawng ang mai alawm kan nih, keimahni leh keimahni hi kan in eizo mai mai alawm' a ti a, a nuihzatthlak viau na a chu a dik hi ka ti a ni," a rawn tichhuak phawng mai a.

  Ni e, kan nawmsak zâwk beiseiin mi tu pawh mai hian ropui nia kan ngaih lam chu nitin kan pan ṭheuh a, eng kawng pawh zawh ila kan tawrh hreh tâwk harsatna hi mi tin hian kan lo tâwk vek a nih dâwn hi ka ti rilru neuh neuh a. Ngaihruatna laka saltang mai kan ni a, hriatrengna kawl kan bun chu chabi nei lo a lo ni. Kan ral riai riai chhung hian lâwm a hnekin kan vui rauh rauh a, kan hawi lêt chhung hian khua a lo thim hman tawh ṭhin.

  He taxi chhunga chuang te pawh hi han nui bâwk bâwk mah se ka Pu hian a fapa hmakhua ngaiin a kun ve tlawk tlawk ṭhin a ni tih a thusawi aṭangin a hriat a, ka hnunga mi pathum te pawh hi amah ang bawka lungngaihna tur hre vek, thawnthu hran theuh nei an ni. Mahse, naktuk a lo thleng a, zing ni chhuak ang êm êm in phur lo mah se nimin aia hlimawm zâwk beisei in an nitin thawh ṭhin lam pan chuan an kawrchung an ha ve ṭhin mai zâwk a lo ni.

  Awh ngah lutuk te, duh ngah lutuk te, tum kan ngah lutuk chhung te hian hun tam tak kan lo hmang ral a, tuma min laksak si loh hian kan nun ber hi keimahni ngeiin kan lo hloh ṭhen mawlh mawlh ṭhin. "Hlimna hi eng nge?" tih a ngaiin ka hre lo va, ho tê tê a lawmna chang kan hriat phawt chuan mi hlim thei tak kan lo ni mai a, harsa chung chung hian mi vannei ber kan lo ni tawh zâwk ṭhin.

  Tukin ah hian vui turin nge i rawn thawh chhuah, hlimna zawng hram hram turin?

March 9th, 2023 (Thursday)

7:44 PM

(Kan Kohhran Chanchin Bu 'Bethany' Editorial Board ten Article ziak tura min sawmna atan a ka ziah.)