Yesterday Once More

 Kum sawm chuang a lo liam ve ta reng mai. A hma nî lawk chuan kan ṭhu mai mai te pawh kan thlan bawrh bawrh kha a nia, tukin kan tho chhuak erawh ka Nu chuan a kawrlum hman thiam sen duk ngei mai chu a inthawlh khur hlak hlak a.

 Tûk ṭhuan ei kham chuan hmanhmawh takin ka intifai a, mawi inti zet chuan ka chalsam chhah tak mai chu ka khuih sawk sawk a, ka lukham hnuaia cheng 20 chu ka kekawrbul ṭial, kawrkilh pali intlar thla ngei mai ah chuan ka khung a, kawngka lam pan chuan ka tlan thla ta vut a. 

 "Bawihte, kawr ban tlawn tal ha ta che. Vawt te pawh hi i hre lo emaw ni?" tia ka Nu min au zui lawm lawm ri pawh chuan vawikhat pawh min hawi lêt tir tawh lo.

 Kawmchhak lam ka thlir vang vang a, "Hmingiiii." ka han ti fan riai riai a; an tukverh kaw tâwp bera rawn dak bu laih chung chuan, "Aw, ka lo chhuk ṭêp," a rawn ti ve lauh a. Vei lam ka'n hawi phei a, ṭhiannu Noeli chu inbual zo tih hriat tak hian a kekawr a rawn ha ṭha mawlh mawlh mai a. 

 "Hmingi i la au lo 'mi?" 

 "Au tawh e, chaw an ei ve chiah a niang."

 A ni pawh chuan Hmingi te in chu a thlêk ta vang vang a; a hritlan lai a ni bawk si a, kan ṭhiannu hming lah chu hritlan laia han kurpui viau chi hming a nih loh avang chuan a ká chu a ang zuau a, puar lo tur tur an puar a hlau leh si a ni ngei ang, a inhnit lêt ta zauh thung a.

 Hmingi pawh a rawn chhuk thla det det a, Mahriati pawh hmanhmawh lutuk in a rawn phei hlawk hlawk a, Nu Mamawitei dawr lam chu kawngpui dung kham zâwnga inkaikuah dal chung chuan kan pan ta hnak hnak a. Vawiin a kan lungkham zawng chu tute in berah nge kan inkhualtelem ang tih vel a ni a, chu lo tih tur dang kan hriat leh chu One Direction hla chu part insem a han zai chiam, Korean hla chi hrang hrang a lam thum dut dut emaw kawngpui a inhruizuan, inlungvawr, in butter-cheese, adt., a ni tawh mai.

 Dawrah chuan kan pawisa neih ang angin Mama bawm lian leh Lasi leh Appy te kan han lei sang sang a, Hmingi te in lamah Mama chu hmarchamuh leh têl nen a bâwl tur chuan kan chho ta ṭham ṭham a. Kha mi ni khan kan inkhualtelem ta nge, fam ta Nu Rosangi'n a hnu a min fiam leh ngei ngei na turin an inchungah kan zaiin kan lam ta chiam tih chu ka sawi fak thei ta lo. Kha mi nî khan chhum te a zing nasa si a, puan pakhat in sin ṭawm chungin ramhuai thawnthu kan sawi ta daih zâwk pawh a ni mai thei. 

Kum sawm chuang a ni tawh ka tih kha, mah se vawiin zet zawng awmnikham in ka lung a lêng a ni deuh ber mai. Hlim tak a han inzui ho leh tur chuan khawvêl in a ken tel dinhmun sawh nghet phawt turin ram hrang hranga kan ṭuan a lo ṭul ve ta a, kei leh kan sulhnu chauh lo chu he ramah hian hmuh tur an awm tawh rih lo. Hmeichhe inkawm khâwm e ti lo chuan mi chanchin ai mah chuan kan chet ṭhin tawhna sawi nuam ti zâwk kan ni roh a, ram leh khawtlang hi ngaihzawng te ai pawhin kan vei zâwk ṭhin, kan titi ngaithla pha chin chuan min nuih tawp zel. Kan in hmangaih thu kan inhrilh in kan lantir ve chiam lem lo va, mah se kan chhiat ṭhat ah kan in theihnghilh ngai hauh lo thung. 

Engtik ah emaw chuan hman ang tho khan Noeli nen Hmingi kan lo nghak ang a, kan nghah pahin Mahriati chu thaw hlawp hlawpin a rawn thleng chho leh ngei dâwn a hriatna hi ka la nei ru tlat a ni. Beiseina nen a hun bi lo chhiar ṭauh ṭauh mai loh chu tih theih ka nei si lova, tun mai a zawi ta riai riai 'Carpenters - Yesterday Once More' chu play nawn leh ngat tur chuan ka tho chhuak ta a. 

30.06.2023

(Friday)

10:00 PM