KA NIHNA

Mi tam tak ka ni a, nihna tam tak ka nei. 

Ka vanneih asiamin Zo nun ze mawi tem theihna ramah ka rawn piang a, ‘A saw!’ an tihna lam lama thle ve mai ṭhin ka ni.

Nula hnahkhat ka ni a.

Ka buaina pakhat chu, ni lo, ka buaina zawng zawng hnuk a ni zawk em? Ka thingpui lum rawn in ringawt lova ka bai chhuan hawp tum an la awm rih lo hi a ni. Keini nulate hian “Oppa,” han ti kur diam diam ṭhin mah ila, chhungkaw pa ber atan chuan a lu chu Krista a ni tih ring tlat Mizo tlangval kan thlahlel a, ṭhiante zingah chauh ni lo, chhungte bula nui ve ṭhin mipa, ruihhloin a sal beh loh hi kan zawng a, buhpawl zinga hriau bo zawn ang maiin a vâng si a, ka buaina hi Mizo nula buaina a nih avangin a nêp lo a nia aw! 

Tlangvalte u, in beidawng hma lutuk! Hringnun hi a tak tak a ni a, a behbawma vehthlema hlawhtlin te in lo tum mai mai ang e. Vannei tur chuan a dawnthleng tha a ngai tih hria ula, hlawhchham saa hlawhtlingte thlir liam mai mai lovin hlawhtling tura hlawhchham ngam mipa kan mamawh. Mizo maktaduai khat zingah tu nge pheichham man vanga hausa min hrilh teh u! Hna thawk an dingchang ṭhin tih hre rual in nih tawh hi?

Pa ni tur chuan nupui sal thei in nih a ṭul avangin in buai tiraw? “Tiam tlat e,” min tihpui ula, kan ṭang dun ang a, Kristian chhungkua chu kan din mai ang. Inneihnain malsawmna a ken tela innghat ngam lova khawvel in mal beih vak vak vang hian alawm Mizo kan tlem!

Harhfima khawvel hmachhawn ngam lo tlangval chu pawnfen fêng tlak pawh a ni lo ve! Chuvangin, khawngaih takin min thihsan tawh suh u aw!

Tlangval tha za zek zawk ka ni a. 

Thiam leh thei emaw intih ngah ve tak ka la ni a. Min ring lo a maw? Futsal khelh nikhuaah chuan ka hmel in hmu ngei ngei ang. Ka username ah pawh KOP, Gooners, tih vel dah pha chin kha ka ni miau a, striker ṭha mi ka nih avangin goal keeper awm chung pawh sawn ka nula duh zawng tak thinlungah chuan ka pet goal theih ka inring tlat a ni. Aw nula, ilo hawi champ phah ringawt ang e. Chicks te hi kan chîk hmasa che u a nia aw! Rawngbawl tura chhandam ṭhalai kan nihna hian eirawngbawlna lam pawh a kawk tho a nia. Pathian ṭih mi, incheina aia zahawmna vawng him tlat duh nula chu insi riala serial film enpui kan hreh hauh lo a nia.

Mi tam tak ka ni ka tih tawh kha

Kei hi beidawnna fa chuam ka ni ve bawk a. Ka rah chin apiang an chim a, vanduaina chuan min um pawh a ni lo, ka tum ram chu min lo thlen khalh zel zawk ni hian ka hre ṭhin. Thiamna, finna leh ropuina lalṭhutthleng te hi ka tan an siam ve lo va, hmangaihna lamah ni se, ka duh poh leh min ten zual sauh e maw tih tur a ni. Ka rualpuite pheichheh khai reng reng chu a rual bik ṭhap ṭhap hian ka hria a, in hniakhnung ka rawn zui a, in hmu thiam ang tiraw? Theihtawp chhuah lo ka ni bik lo asin.

Zan boruak thiang vuk hnuaia thlamuang taka in muthillh siai siai lai khan ‘aw’ chuan khum laizawlah ka hnufualzia, ka chepzia leh ka tet bikzia te hi min fah mawlh mawlh a, beidawnna khuarkhurum mawng nei lovah chuan ka tla riai riai a ni. In hmuh si loh hian nung reng chungin ka thi mek asin. Chu beiseina thingzar hmanga beidawnna hrualhrui ka suih tak ni la la chuan, chu’ng thawm bengchheng tak tak, ka tlin lohna min hrilh nawntu leh saruak ka nih min hriattirtute chu ka chunnu awrawl nena tehkhin rual an lo ni lo. Ka pa inchhir hmel saw in hmu lo em ni? “A pawi vawng, a pawi vawng,” tiin a rum a, ka tisa tal chelh din theih beiseiin min kuangkuah asin! Pa hnen ka han thleng a, zawhna leh demna a khat mihring hian sawi tur a hre hauh lo nia maw le.

Kei erawh chu beiseina a khat ka ni a. Ka thisenah hian lungawina a zam vel a, hlimna nen chuan ṭhian ṭha ber kan ni. Vanneihna hian min thlawh khum mah se tha tho takin ka um zui a, chu a kalkawngah chuan harsatna tâwk lo ka ni bik lo. Ka tha a ṭhum fo a, chakna leh châkna reng reng ka nei lo va, ka mittui hial a tla ṭhin. Mahse, ka unau, kei chuan pan tur dik ka pan ṭhin asin! ‘Isua’ an tih hi ilo hre ve tawh em? A ni chuan ka kal leh ka mu hi mi en ngun ṭhin a, ka ngaihtuahna hi hla tak aṭang pawhin a hrethiam ṭhin. A ruka siama ka awma, lei hmun hnuaihnung bera mawi taka siama ka awm lai khan ka ruhrel chu A lakah thupin a awm lo. A thlamuanna, rilru reng renga hriat sen lohvin min chenchilh miau avangin A lakah chuan ka tlawm a, ka tlawm vawng vawng a ni! A hmangaihna tem chhin tawhtu tan chuan a beidawn theih lova, zawmthaw taka sulhnu hnutchhiah leh a ruk a rala a thim lam lam pan a rem ve lo. Amah hrechiang apiang chuan heti hian an lo ti ṭhin – ”Ka tlakchham thu sawi zawng ka ni lo ve; kei zawng eng ang pawhin awm mah ila, lungawi zel ka ching tawh si a.”

Ka nihna hi han sawi ve dawn ula, dai pelh leh ṭhin, sawi loh tur sawi fo leh hmel bak chhuan tur nei lo ka ni. Heti ve mai hi niin min hria a ni maithei, hei erawh chiang takin ka sawi ngam – Pathian Fa ka ni tih hi. Chu chu ka nihna, kan nihna a ni.

(Note: Chhinga Veng Pastor Bial KṬP Kum Chanve Intawhkhawm vawi 16-na ah kan hruaitute chuan Recitation sawi turin min rawn ruat mauh mai! Ka huphurh na leh ka tlin lohna chu a inchen reng âwm e. Mahse, ka theih tâwk ni a an hriat loh ah min ruat ka ring bawk si lo, Rawngbawlna tlanchhiat san ka duh lo bur bawk si. Ka rilru lah a hah, a châwl thei chuang bawk si lo. Ka Pa leh ka u, Lalrinsanga (Tetea) leh min ṭawngṭaipui ṭhin tute ka tan an hlu êm êm.

Fiamthu thawh ve châng pawha a nuihzatthlak lai sawi theihnghilh ṭhin hi U Tetea'n a thuziah sa ami lâk chhuah min phalsak a. Tin, ka Pa in ka ziah sa min ennawn sakin a phuah belh ngai min tihdanglam sak bawk a, ka mawhphurhna te ka hlen ve thei ta. Chuvangin, miin hawihhawm taka min han fak der ve châng pawh a, "I va ziak thiam ve!" an tih pawh hian ka ṭawngkam thiam zawng zawng sawm khawmin, "Kan ziah." ka ti deuh kher zel. A hlu êm a, ka tihbo hmain dah ṭhat ngei ngei a ngai😂)