if

  Kum 1971 a ni a. Zanriah eikham ah chuan David Gates-a nupui chuan an fate mut pindan lamah a hruai lût a, naupang harh rual tih takah an ri leh lêng lûng ṭhin a. An chaw ei dawhkan ah chuan David chu a ṭhu vang vang a, zan boruak thiang vûk leh reh ruih hnuaia a nupui fanau te hlim taka an nui ri leh kar kar ṭhin te chuan a thinlung lo hliam tawh zawng zawng kha a thawi dam a ni chêk ang chu, khawvela 'love song' ka ngaihthlak tawha ka ngainat ber leh mawi ka tih ber, 'IF' hi hun reilote chhungin a lo phuah zo ta a ni. He thuziak hi hla a ni satliah lova, hlachham mi atan pawh dah se engtin tin emaw a rawn lar tho ang a, a chuai theih chuan hi ka ring lo a ni. 

"If a picture paints a thousand words

Then why can't I paint you?

The words will never show the you I've come to know" 

tiin bul a rawn ṭan a. 

  Thu pawhin a sawifiah thiam loh hi lemziak chuan a lo phawrh chhuak fo tawh a. Francesco del Giocondo, Italian sumdawng hausa tawntaw khan a in thara tar atan a nupui thlalak ngei chu a duh a. Kum 1503 bawr vel khan Leonardo da Vinci chu a lo ziahtir a, 'Mona Lisa' chu tun thlengin lemziak mawi ber te zing ami, chanchin ngah leh ngaihnawm a lo ni ta zel anih hi. Chhui tham fe awm mah se he lemziak kan neih theihna chhan bulpui ber chu hmangaihna kha a ni a, ṭawngkam maia sawi sen loh chu lemziak in lantir a lo tum a ni. 

Mahse, David Gates hian lemziak pawhin chu a hmangaihna chu puang dâwn se a hen thei tur awmin a hre lo va, thu phei chuan chu a hmangaihna chu ziahchhuah ngaihna a awm lo sa a ni.

"If a face could launch a thousand ships

Then where am I to go?

There's no one home but you

You're all that's left me to

And when my love for life is running dry

You come and pour yourself on me"

  Trojan War, khawvel in a hriatreng tawh tur indona rapthlak ber te zing a mi chawk chhuaktu chu Helen of Troy hmelṭhatna kha a ni ber mai âwm e. A tisa mawina ringawt pawh chuan lawng lêng sang tam tak chu tuipuiah a virtir mup mup thei a, thihna rapthlak tak tak a thlen phah hial anih kha. Chu hmangaihna atthlak tak nia kan hriat avanga khawvel a buai mup mup lai pawh chuan a phuahtu chuan a hmangaih bulah bawk kir leh a duh a. Mahni inlumah ngei chuan a thla a muang a, a hmangaih hnena chawlh tluka chawlhna nuam a hre chuang lo. Hmangaihtu zawka ṭan reng a theih loh châng a awm a, taksa leh chhungril a hul huk châng pawh a awm fo va. Chutih hunah chuan a hmangaih chuan a lo kuangkuah a, tui hna kang mai tur titling leh tur chuan amah ah a rawn inpe mai ṭhin.

"If a man could be two places at one time

I'd be with you

Tomorrow and today, beside you all the way"

  Hun hi in ṭhensawmin, mihring chu hmun dang dangah a rualin awm thei pawh ni se a hmangaih bulah chuan a awm fovang a. Naktuk lo la awm tur te, nimin liam taah leh vawiinah te pawh a hmangaih kianga awm chu a thlang chawt a ni ber mai!

"If the world should stop revolving spinning slowly down to die

I'd spend the end with you

And when the world was through

Then one by one the stars would all go out

Then you and I would simply fly away" 

  Khawvel chu dan ang lova a vir hun a lo thleng a, a tha ṭhum hun chu lo thleng pawh ni se a hmangaih chu a kai tlat ang a. Vana arsi te khi an enna a lo chuai tial tial ang a, khawvel chu anih dan tur ang lo ni lo mah se an chhehvel chu a pawimawh lo va. Khawvel ral ruala ral ve mai lo tur an hmangaihna chu hruihrual nghet taka suihzawmtu a lo ni ang a, a hmangaih ber nen chuan hlim takin an thlawk delh delh tawh mai dâwn a lo ni. 

  Hmangaihna hi he khawvela chêng tawh, chêng mêk leh chêng turte zingah hian famkim taka hrefiahtu kan la awm tak tak lo va. Isua ngei pawh kha hmangaihna 'vanga a tuar dâwn khan a huphurh ve tho nia. 

  David Gates hian hmangaihna hi a hrefiah fai fek fawk bîk lo ang; amaherawhchu, kei ngei pawhin, "A ni tak maw?" ka tih vawng vawng theih tura mawl mang si, chiang tak siin a lo phuahchhuak a. Hmangaihna chu hmangaihna a lo ni tawp mai a, thil khirh tak leh zir chian vak ngai a lo ni lêm lo. Hmangaihna avanga kan buai kan buai a, kan nihna leh dinhmun theihngilh ṭhak a kan lo ât tawh hi chuan, "Hmangaihna nge khawngaihna?" tih hi inzawh fo a lo ṭul tawh ṭhin.